Skólastjóri Grunnskóla Bolungarvíkur
Bolungarvíkurkaupstaður leitar að drífandi og framsýnum leiðtoga í starf skólastjóra við Grunnskóla Bolungarvíkur.
Um er að ræða ábyrgðarmikið starf þar sem unnið er að því að viðhalda og þróa öflugt og framsækið skólasamfélag í nánu samstarfi við starfsfólk, nemendur, foreldra og nærsamfélagið. Leitað er að einstaklingi sem hefur metnað til að leiða faglegt starf, byggja upp jákvætt starfsumhverfi og vinna markvisst að áframhaldandi þróun skólastarfs í takt við menntastefnu sveitarfélagsins.
Grunnskóli Bolungarvíkur er framsækinn skóli þar sem lögð er sterk áhersla á sköpun, rannsóknarnám, læsi og farsæld nemenda. Skólinn á í góðu og virku samstarfi við nærsamfélagið, vinnustaði og stofnanir. Hann býr jafnframt yfir víðtækri reynslu af alþjóðlegu samstarfi og leiðir tveggja ára Erasmus+ verkefni í samstarfi við skóla í nokkrum Evrópulöndum. Í skólastarfinu er lögð áhersla á virkni, sjálfstæði og rödd nemenda, sem birtist meðal annars í skapandi verkefnum og fjölbreyttum námsmatsleiðum. Skólinn er leiðsagnarnámsskóli, UNESCO-skóli og byggir agastefna hans á hugmyndafræði jákvæðs aga. Hér gefst skólastjóra tækifæri til að leiða öflugt og metnaðarfullt skólastarf í samhentu og skapandi umhverfi.
Starfið er laust frá og með 1. ágúst 2026 eða eftir nánara samkomulagi.
Helstu verkefni og ábyrgð:
- Fagleg forysta og leiðtogahlutverk í þróun skólastarfs í samræmi við menntastefnu sveitarfélagsins, aðalnámskrá og lög um grunnskóla
- Ábyrgð á daglegri starfsemi og rekstri skólans, þar á meðal fjárhag og skipulagi
- Starfsmannamál, ráðningar, starfsþróun og efling jákvæðs starfsumhverfis
- Leiða umbóta- og þróunarstarf í skólanum
- Virk og uppbyggileg samskipti við foreldra, fagaðila og nærsamfélag
- Önnur verkefni sem tengjast stjórnun skólans í samráði við yfirmann
Menntunar- og hæfniskröfur:
- Kennaramenntun og leyfisbréf kennara
- Framhaldsmenntun á sviði stjórnunar eða haldbær stjórnunarreynsla
- Þekking og reynsla af skólastarfi og umbótastarfi
- Reynsla af mannauðsstjórnun, stefnumótun og áætlanagerð
- Reynsla af fjármálastjórnun er kostur
- Sterk leiðtogahæfni og framúrskarandi samskiptahæfni
- Góð skipulagsfærni og sjálfstæði í vinnubrögðum
- Frumkvæði, jákvæðni og metnaður í starfi
Bolungarvík er samhentur sjávarbær á Vestfjörðum, umlukinn fallegri náttúru og ríkulegum tækifærum til útivistar og mannlífs. Í bænum er öflugt samfélag þar sem lögð er áhersla á gott skólastarf, fjölskylduvænt umhverfi og sterkt samstarf íbúa, stofnana og atvinnulífs.
Með umsókn skal fylgja starfsferilskrá, leyfisbréf og kynningarbréf þar sem gerð er grein fyrir ástæðu umsóknar og rökstuðningur fyrir hæfi umsækjenda.
Laun eru samkvæmt kjarasamningi Samninganefndar sveitarfélaga (SNS) og SÍ.
Bolungarvíkurkaupstaður áskilur sér rétt til að hafna öllum umsækjendum.
Gerð er krafa um hreina sakaskrá og heimild til að afla upplýsinga þar að lútandi.
Við hvetjum fólk af öllum kynjum til að sækja um starfið.
Upplýsingar um starfið veitir Jón Páll Hreinsson, bæjarstjóri Bolungarvíkurkaupstaðar, jonpall@bolungarvik.is
Umsóknarfrestur er til og með 30. apríl 2026