Fara í efni

Sorphirða og flokkun

Með þátttöku okkar allra stuðlum við að hreinna umhverfi. Hér finnur þú allar upplýsingar sem þú þarft til að flokka rétt og meðhöndla úrganginn á réttan hátt.

Á hverju heimili eru tvö sorpílát

  • Tunna fyrir almennt sorp og lífrænn úrgangur
  • Tunna fyrir pappi/pappír og plastumbúðir

Íbúar og fyrirtæki geta einnig farið með flokkað sorp og úrgang á gámastöð

Gámastöð
Sorphirðudagatal Bolungarvíkur 2026

Heimilissorp

Með síðustu breytingum á lögum um meðhöndlun úrgangs var komið á samræmdu flokkunarkerfi yfir allt land. Þetta er mikilvægt fyrir innleiðingu hringrásarhagkerfis á Íslandi og stórt framfaraskref, þar sem sýnt hefur verið fram á að sérsöfnun á hráefni leiðir til meiri og betri flokkunar.

Nýja flokkunarkerfið byggir á sérsöfnun á eftirfarandi flokkum við íbúðarhús;

  • Pappír og pappi
  • Plastumbúðir
  • Lífrænn eldhúsúrgangur
  • Almennt sorp

Hvert heimili er með tvö sorpílát:

  • Tunna fyrir almennt sorp og lífrænan úrgang.
  • Tunna fyrir pappír, pappa og plastumbúðir.

Tunnurnar eru losaðar samkvæmt  sorphirðudagatali á hálfsmánaðar fresti, þar sem almennt sorp og lífrænn eldhúsúrgangur er tekið eina vikuna og sorp til endurvinnslu þá næstu.

Flokkun úrgangs

Setjið almennt sorp í svarta, stóra hólfið.

  • T.d. ryksugupokar, einnota hanskar, pappírsþurkkur, óhreinar umbúðir, umbúðir sem ekki er hægt að aðskilja, hrá matvæli, tyggjó, ryksugupokar, einnota bleyjur, einnota dömubindi og blautklútar.
  • Hvað má ekki fara í: Umbúðir sem hægt er að flokka, spilliefni eða raftæki.

Athugið: Þetta er úrgangur sem fer í urðun eða brennslu.

Setjið lífrænan eldhúsúrgang í brúna hólfið í almennu tunnunni, ekki svarta hólfið í endurvinnslutunnunni. 

  • Matvæli, matarafganga, kaffikorg, tepokar og niðurbrjótanlegir pokar.
  • Hvað má ekki fara í: Plastpokar, málmar eða annað ólífrænt efni.

Lífræna eldhúsúrganginum er umbreytt í moltu sem t.d. er hægt að nýta í landgræðslu. Nota skal því eingöngu jarðgeranlega poka, þessir pokar fást td. hjá Terru og eru úr lífrænni sterkju.

Setjið hreinan pappír og pappa í hólfið fyrir pappír og pappa í endurvinnslutunnuna, ath ekki í svarta hólfið. 

  • Pappír, bylgjupappa, fernur, sléttan pappa, dagblöð og tímarit.
  • Hvað má ekki fara í: Óhreinar umbúðir eða blandaðar umbúðir.

Athugið: Pappi á ekki að vera í plastpokum. Hann á að setja beint í endurvinnslutunnuna. Það má ekki blanda plasti og pappa í sama hólf.

Setjið plastumbúðir í svarta hólfið í endurvinnslutunnunni.

  • Allar plastumbúðir, svo sem plastpokar og matarílát úr plasti.
  • Hvað má ekki fara í: Óhreinar plastumbúðir, plastblöndur með öðrum efnum.

Þrífið plastumbúðir og notið glæra plastpoka ef pokar eru notaðir.
Ef ekki er hægt að þrífa umbúðirnar, eiga þær heima með almennu sorpi.

Sérstakir úrgangsflokkar

Eftirfarandi úrgangsflokkar eiga allir að fara á gámastöðina við Tjarnarkamb 1

  • Umbúðir sem bera skilagjald, svo sem áldósir, plastflöskur og glerflöskur.
  • Umbúðirnar skulu vera tómar og hreinar áður en þeim er skilað.

Skilagjald er hægt að fá endurgreitt á endurvinnslustöðvum eða í gámastöðinni. Einnig er hægt að gefa þessar umbúðir til styrktar félagasamtökum.

  • Afklippur af trjám, gróðurmold, grjót, lauf og gras.

Athugið: Garðaúrgangur skal fara á gámastöðina. Lífrænn úrgangur úr garðinum á ekki að fara í sorptunnur. Einnig er hægt að koma sér upp safnhaug eða safnkassa í eigin garði þar sem úrgangurinn rotast og verður að gróðurmold.

  • Eiturefni eins og olía, leysiefni (t.d. þynnir og terpentína), lakk- og málningarafgangar, skordýraeitur, sýrur, basar, kvikasilfur, úðabrúsar, bílarafgeymar, rafhlöður, flúrperur, sparperur og lyfjaafgangar.

Athugið: Spilliefni innihalda hættuleg efni og skal því fara með þau á gámastöðina þar sem þau eru meðhöndluð sérstaklega.

  • Endurnýtanleg og ónýt húsgögn, húsbúnað, ýmis tæki og tól, málma, timbur, pappa, plast, fatnað, skó o.fl.

Til að fyrirbyggja misskilning þá þurfa íbúar ekki að greiða fyrir skil stærri raftækja.
Þó að smærri nytjahlutir komist í tunnurnar, er þó æskilegt er að fara með þá í gámastöðina.

  • Gler og málmumbúðir skal safna saman og fara með í móttökustöð á gámasvæði við áhaldahús bæjarins, Tjarnarkambi 1.

Staðsetning og aðgengi tunna

Æskilegt er að sorptunnur séu staðsettar við framanvert hús og mikilvægt að gæta þess að aðgengi við losun sé ætíð sem best. Afar mikilvægt er að íbúar moki snjó frá sorptunnum. Festingar á tunnum skulu vera þannig að auðvelt sé að losa þær og festa aftur.

Yfirfullar tunnur

Tunnur skulu ekki fylltar meira en svo að þeim sé hægt að loka. Yfirfullar tunnur geta valdið vandræðum og sóðaskap þegar þær eru losaðar. Yfirfullar tunnur verða ekki losaðar og er íbúum bent á gámastöð.