Vegfarendur í Bolungarvík hafa vafalaust séð að búið er að koma hraðahindrunum fyrir á Þuríðarbraut, við innkomuna í bæinn og við grunnskólann. Þessi framkvæmd kemur í kjölfar tveggja umferðarslysa sem hafa orðið á síðustu tveimur vikum og er ætlað að draga úr ökuhraða.
Umhverfismálaráð Bolungarvíkurkaupstaðar vinnur um þessar mundir að heildstæðri umferðaröryggisáætlun fyrir sveitarfélagið og því eru hraðahindranirnar bráðabirgðaaðgerð á meðan sú vinna stendur yfir. Markmiðið er að auka öryggi allra vegfarenda og minna ökumenn á að fara varlega, sérstaklega á svæðum þar sem börn eru á ferðinni.
Undanfarin misseri hafa íbúar komið á framfæri ábendingum um hraðakstur á þessum slóðum og er uppsetning hraðahindrananna liður í því að bregðast við þeim áhyggjum. Sveitarfélagið mun fylgjast með áhrifum aðgerðanna og halda áfram vinnu við frekari úrbætur í umferðaröryggismálum.
Bolungarvíkurkaupstaður hvetur alla ökumenn til að sýna aðgát í umferðinni og þakkar Vegagerðinni fyrir skjót viðbrögð.