• Syðridalur og Bolungarvík

Gönguleiðir

Gönguleiðir í Bolungarvík og nágrenni. 

Bolafjall

Á leiðinni til Skálavíkur er akvegur upp á Bolafjall sem er opinn almenningi í júlí og ágúst. Vegurinn er nokkuð brattur. Þá er einnig vinsælt að ganga upp á fjallið eftir veginum og tekur sú ganga um einn og hálfan tíma.  

Ganga upp á Upsir 

Bílnum lagt nyrst í bænum, troðningur er upp á öxl Traðarhyrnu og varða með stöng á áfangastað, tekur um 20 mínútur að ganga. Frábært útsýni yfir Ísafjarðardjúpið og á haf út. 

Skálavík 

Skálavík er í um 15 mínútna akstursleið frá Bolungarvík. Þar fór byggð í eyði fyrir rúmlega 40 árum. Þangað er gaman að aka og ganga fjöruna fyrir opnu hafi. Hægt er að ganga þaðan fjallaleið að Galtarvita. 

Skemmtiganga frá Óshólavita 

Ofantil við Óshólavita er gamall vegur sem er gaman að ganga upp, en sú ganga er létt og tekur u.þ.b. 15. mín. Uppi er lítil flöt þar sem gott er að setjast niður, virða fyrir sér undur veraldar, bláan himin, opið haf og fjallahringinn sem umlykur Bolungarvík og gætir Bolvíkinga. Frábær íhugunarstaður.