• Bolungarvík - undir Traðarhyrnu

18. maí 2017

Umhverfisátak og grill

Bolungarvíkurkaupstaður boðar til umhverfisátaks í maí 2017 þar sem íbúar eru hvattir til að huga að nánasta umhverfi.

Íbúar eru beðnir um að tína upp bréfarusl, plast, dósir og annað smálegt sem hefur lent á röngum stað hjá okkur yfir veturinn. 

Eigendur fyrirtækja í sveitarfélaginu eru hvattir til að taka fullan þátt í umhverfisátakinu, sér í lagi með því að fjarlægja brotmálma, timburúrgang og annað sem safnast hefur á lóðir þeirra, sjá nánar hér neðar. 

Í tengslum við umhverfisátakið verða afklippur af trjám og runnum og annar garðaúrgangur fjarlægður garðaeigendum að kostnaðarlausu á eftirfarandi dögum:

  • Mánudaginn 22. maí
  • Mánudaginn 29. maí
  • Mánudaginn 5. júní 

Garðaúrgangur ætti að vera í pokum, en trjágreinar bundnar saman og staðsett þannig að vel sé aðgengilegt starfsmönnum bæjarins. 

Salt til gróðureyðingar er hægt að fá ókeypis hjá hafnarvog og við áhaldahús.

Hreinsunardagur og grill

Íbúar eru einnig boðaðir til sérstaks hreinsunarátaks laugardaginn 27. maí kl. 10-12. Í hádeginu grillum við síðan hjá félagsheimilinu. 

Íbúar ofan Völusteinsstrætis hittast á mótum Holtabrúnar og Þjóðólfsvegar og skipta sér á svæði 1 og 2. Íbúar neðan Völusteinsstrætis hittast á planinu við sundlaugina og skipta sér á svæði 3 og 4.

Image1

  • Svæði 1 er ofan Völusteinsstrætis og innan Þjóðólfsvegar, þar með talin skógræktin og nær að Hólsá.
  • Svæði 2 er ofan Völusteinsstrætis og utan Þjóðólfsvegar
  • Svæði 3 er neðan Völusteinsstrætis og utan Skólastígs
  • Svæði 4 er neðan Völusteinsstrætis og innan Skólastígs

Tómir ruslapokar verða afhentir við upphaf átaksins við sundlaug og skógrækt. Síðan verður tekið við þeim (fullum) á planinu við sundlaugina og einnig má setja þá við næstu götu og þeir verða þá teknir. 

Eigendur og forsvarsmenn fyrirtækja athugið!

Ákveðið hefur verið að taka við timbri og málmum án endurgjalds í maí. 

Málmar

Settur verður brotajárnsgámur fyrir utan áhaldahús og hægt verður að skila þangað málmum fyrir utan gáminn. Starfsmenn áhaldahúss munu sjá um að setja í gáminn og koma í endurvinnslu. Ekkert gjald verður tekið fyrir þessa þjónustu í maí.

Timbur

Opið verður á endurvinnslusvæðinu á „Hólnum“ fyrir ofan kirkjuna alla mánudagana 22. og 29. maí á milli kl. 13 og 19. Starfsmaður áhaldahús mun taka á móti þeim sem vilja losa sig við timbur. Ekkert gjald verður tekið fyrir þessa þjónustu í maí.

Eftir að maí lýkur mun gjaldtaka hefjast að nýju. Þá má jafnframt búast við því að gripið verði til aðgerða til að fylgja eftir að lóðareigendur uppfylli sínar skyldur um umgengni og útlit lóða sinna. 

Vert er að vekja athygli á að bæjaryfirvöld hafa víðtækar heimildir til að grípa til aðgerða gagnvart þeim aðilum sem ekki sinna tilmælum. Samkvæmt ákvæðum 56. gr. mannvirkjalaga nr. 160/2010 og gr. 2.9.2. í byggingarreglugerð nr. 112/2012 er hægt að grípa til aðgerða sem felur í sér m.a. beitingu dagsekta eða ákvörðun byggingarfulltrúa um að láta fjarlægja drasl á lóðum á kostnað eiganda.