Aðal- og deiliskipulag
Á skipulagsvefsjá Skipulagsstofnunar er hægt að skoða gildandi aðal- og deiliskipulag á landinu öllu út frá staðsetningu á korti.
Aðalskipulag
Aðalskipulag er skipulagsáætlun fyrir eitt sveitarfélag og nær til alls landsvæðis þess.
Í aðalskipulagi setja sveitarstjórnir fram stefnu sína um landnotkun, byggðaþróun, byggðamynstur, samgöngu- og þjónustukerfi og umhverfismál. Aðalskipulag skal ná til a.m.k. 12 ára tímabils og er grundvöllur deiliskipulags þar sem skipulag einstakra svæða er nánar útfært.
Aðalskipulagi er ætlað að stuðla að skynsamlegri og hakvæmri nýtingu lands og landgæða og tryggja varðveislu náttúru- og menningarverðmæta, jafnframt því að koma í veg fyrir umhverfisspjöll og ofnýtingu.
Aðalskipulaginu er ætlað að vera virkt stjórntæki og nýtast beint við ákvarðanir og áætlanir sveitarfélags sem varða ráðstöfun lands á einn eða annan hátt. Skipulagið ber að vinna í sem mestri samvinnu við íbúa og aðra hagsmunaaðila.
Deiliskipulag
Deiliskipulag er skipulag fyrir afmarkað svæði, svo sem hverfi eða götureiti, sem felur í sér skipulagsskilmála um byggðarmynstur, lóðir, byggingar og fleira. Deiliskipulag er byggt er á aðalskipulagi og kveður nánar á um útfærslu þess. Í deiliskipulagi eru sett ákvæði um byggingarheimildir og útfærslu bygginga og frágang umhverfis.
Skipulagkynningar
Skipulagskynningar og athugasemdir eru birtar í Skipulagsgátt Skipulagsstofnunar