Reglur um ferðaþjónustu fatlaðra

1. gr. Markmið
Markmið ferðaþjónustu fatlaðra er að gera fötluðum sem ekki geta nýtt sér almenningsfarartæki og/eða eigin farartæki kleift að stunda atvinnu og nám, njóta tómstunda og sækja þjónustu sem veitt er fötluðum sérstaklega, s.s. hæfingu og endurhæfingu .

2. gr. Réttur til þjónustunnar
Ferðaþjónusta fatlaðra er ætluð fyrir þá íbúa sveitarfélagsins sem eru:
a) Bundnir hjólastól
b) Blindir
c) Ófærir um að nota almenningsfarartæki og/eða eigin farartæki eða þurfa akstursþjónustu vegna annarrar fötlunar

3. gr. Afgreiðsla og mat umsókna
Sækja skal um ferðaþjónustu fatlaðra hjá félagsmálastjóra Bolungarvíkurkaupstaðar á þar til gerðu eyðublaði. Skal hún metin á grundvelli möguleika umsækjanda til að nýta sér þjónustu almenningsvagna og/eða aðra ferðamöguleika. Ákvörðun um þjónustu er hægt að skjóta til Velferðaráðs Bolungarvíkurkaupstaðar.

4. gr. Gjaldskrá
Ekki er greitt fyrir ferðir til að sækja sérhæfða þjónustu við fatlaða, svo sem hæfingu, endurhæfingu og félagsstarf fatlaðra. Fyrir aðrar ferðir svo sem til og frá vinnu og skóla er greitt samkvæmt gjaldskrá almenningsfarartækja.

5. gr. Gildistími
Reglur þessar voru samþykktar í Velferðaráði Bolungarvíkur þann 9. septermber 2008 og í Bæjarstjórn Bolungarvíkur þann 2. október 2008.