• Útsýni af Bolafjalli

Bolafjall

Bolafjall er 638 metra hátt fjall fyrir ofan Bolungarvík. 

Brattur akvegur liggur upp á Bolafjall en þar er ratsjárstöð Landhelgisgæslu Íslands. Vegurinn hefur verið opinn bílum í júlí og ágúst. 

Á Bolafjalli er hrjóstrug háslétta og þaðan er mikið víðsýni til allra átta enda er Bolafjall vinsæll viðkomustaður á Vestfjörðum. 

Þverhnípt er fram af fjallinu og afar varasamt fara nálægt brúninni. Gæta þarf þess að börn séu ekki eftirlitslaus. 

Útsýnispallur á BolafjalliMikil uppbygging er að hefjast á ferðaþjónustumannvirkjum á Bolafjalli en þar reka Landhelgisgæslan og Atlantshafsbandalagið ratsjárstöð. Verður þar meðal annars komið fyrir stórum útsýnispalli, þjónustuhúsi, verslun, safni og bílastæðum fyrir bæði fólksbíla og rútur. Verður ferðaþjónustan stíluð inn á bæði náttúruna, útsýnið og ratsjárstöðina sjálfa.

Framkvæmdasjóður ferðamannastaða veitti 160 milljónum króna til byggingar útsýnispalls á Bolafjalli. Pallurinn, sem er nú í smíði í Póllandi, verður boraður inn í fjallið um leið og fært verður í vor eða sumar 2021. Síðan verður hann opnaður um haustið.

Vonir standa til að með pallinum verði Bolafjall einn af vinsælustu ferðamannastöðum Vestfjarða.