Aðvörun vegna mikillar úrkomu

Sérstaklega mun áhrifa gæta á sunnanverðum Vestfjörðum, Snæfellsnesi, Borgarfirði og á svæðum umhverfis Mýrdalsjökul og Vatnajökul.

Reikna má með miklum vexti í ám á þessum svæðum og vill Slysavarnafélagið Landsbjörg sérstaklega vara innlenda sem og erlenda ferðamenn við ám á leið í Þórsmörk og Bása svo og ám á Syðri- og Nyrðri Fjallabaksleiðum. 

Má reikna með að margar ár á þessum svæðum verði ófærar og hreinlega hættulegt að reyna að þvera þær. 

Víða til fjalla verður einnig hætta á aurflóðum svo og má benda ökumönnum hópferðabifreiða og þyngri bíla á að vegkantar gætu verið veikari vegna mikillar úrkomu.

Á þessum árstíma er alvanalegt að haustlægðir skelli á landinu en það ber að taka sérstaklega fram að hér erum við að sjá mun meiri úrkomu en í hefðbundnu ári og því ber að hafa sérstaklega varann á. 

Eru ferðaþjónustuaðilar sérstaklega beðnir um að upplýsa sína viðskiptavini um þessar aðstæður.