• Friðrik Valdimar Árnason og Jón Páll Hreinsson

8. nóvember 2016

Orkusalan gefur hleðslustöðvar

Orkusalan gefur öllum sveitarfélögum landsins hleðslustöð fyrir rafbíla. 

Með þessu vill fyrirtækið auðvelda rafbílaeigendum að komast leiðar sinnar hringinn í kringum landið. 

Jón Páll Hreinsson, bæjarstjóri, tók í dag við hleðslustöð fyrir Bolungarvíkurkaupstað úr hendi Friðriks Valdimars Árnasonar, orkuráðgjafa hjá Orkusölunni.

Við þökkum Orkusölunni kærlega fyrir þessa góðu gjöf og munum koma henni fyrir hjá okkur í sveitarfélaginu svo að hún gagnist sem flestum rafbílaeigendum, sagði Jón Páll við móttöku stöðvarinnar. 

Ísland er í lykilstöðu til að leiða rafbílavæðingu heimsins og vill Orkusalan leggja sitt af mörkum með samfélagslega ábyrgð að leiðarljósi.

Samkvæmt upplýsingum frá Orkusölunni felst lítill tilkostnaður í því fyrir sveitarfélögin að koma stöðvunum upp. Hann kann helst að felast í útseldri vinnu við uppsetninguna og vegna lagnavinnu. 

Stöðvarnar eru 22 kílówött og þriggja fasa 32 ampera.

Orkusalan er dótturfyrirtæki RARIK.